Аз шанбегӣ то карнавал бо Убайдуллоев: Эълони 9 рӯзи ид дар Душанбе
Маҳмадсаид Убайдуллоев, раиси шаҳри Душанбе дар ҷаласаи ахири шаҳрдорӣ гуфтааст, 90 солагии пойтахти Тоҷикистон 9 рӯз-аз 11 то 19-уми октябр ҷашн гирифта хоҳад шуд.
Тибқи иттилои дафтари матбуоти шаҳрдорӣ Убайдуллоев аз сокинон ва меҳмонони пойтахт даъват намудааст, ки тайи ин рӯзҳо дар ташкили фазои идона ва ободкориҳо фаъол бошанд.
Ба иттилои манбаъ таҷлили 90-солагии пойтахт 11-уми октябр аз маъракаи ободонии дастаҷамъонаи ҳар як сокини шаҳр зери шиори «Мо метавонем!» оғоз мегардад: “12 октябр ҷашнвора дар тамоми шаҳраку маҳаллаҳо аз соати 10-и субҳ оғоз гардида, дар «Маҷмааи савдо Пойтахт 90» намоишгоҳи маҳсулоти ниёзи аваалия барои дастархони идонаи сокинон ташкил мешавад.”
Дафтари матбуоти шаҳрдорӣ афзуд, ки рӯзи 13 –уми октябр дар Боғи устод Рӯдакӣ барои сокинони ноҳияи И.Сомонӣ, 14 –уми октябр дар майдони 800-солагии Москва барои сокинони ноҳияи Шоҳмансур, 15-уми октябр дар Боғи Дӯстии Халқҳо барои сокинони ноҳияи Фирдавсӣ ва 16-уми октябр дар боғи Кӯли ҷавонон барои сокинони ноҳияи Сино соати 17-30 бо иштироки бевоситаи Раиси шаҳр тантанаҳои ҷашнӣ доир карда мешаванд.
Инчунин 17-уми октябр дар Душанбе Рӯзҳои Санкт-Петербург, 18 октябр, соати 10-00 ҷаласаи тантанавӣ ва консерти идонаи 90-солагии пойтахт дар толори Театри опера ва балет дар нақша буда, 19-уми октябр соати 10-00 таҷлили 90-солагии пойтахт бо Карнавали идонаи сокинони шаҳр дар Боғи Наврӯзгоҳ анҷом меёбад.