Ордени шоҳи Саудӣ ба Сисӣ
Шоҳи Арабистони Саудӣ Абдуллоҳ бо раисҷумҳури Миср Абдулфаттоҳ Сисӣ дар шаҳри Ҷидда муносиботи дуҷониба ва авзои Ховари Миёнаро баррасӣ кардаанд. Кӯмаки молии Эр Риёд ба Қоҳира низ як бахши суҳбати ҷонибҳо будааст.
Баъди ба курсии президентии Миср нишастани Сисӣ ин нахустин сафари расмии ӯ ба Арабистони Саудист. Бино ба иттилои хабарҳо, бори охир Сисӣ бо шоҳ Абдуллоҳ дар фурудгоҳи Қоҳира суҳбат доштанд. Он вақт Абдуллоҳ аз истироҳат аз Марокаш бармегашт ва раисҷумҳури Мисрро ба дохили ҳавопаймояш даъват намуд.
Расонаҳо мегӯянд, дар вохӯрии ахир дар Ҷидда шоҳ Абдуллоҳ омодагии худро барои кӯмак ба иқтисоди Миср изҳор доштааст. Ба ҷуз ин, ӯ ба Сисӣ ордени шоҳ Абдулазиз тақдим кардааст.