Дарёфти кӯдаки навзод дар маркази шаҳри Хоруғ
Мақомоти пулиси Тоҷикистон мегӯянд, дар шаҳри Хоруғ маркази маъмурии вилояти Бадахшон як тифли навзоди бесаробон дарёфт шудааст.
Ба иттилои манбаъ ин тифл, ки ҳамагӣ як рӯз дорад, субҳи барвақти 20-уми июл дар бинои рақами 9, дар ошёнаи дуюм, дар назди дари хонаи истиқоматии сокини 65-солаи Хоруғ- Яминшо Ҷамолов дарёфт гардидааст. Маъмурини пулис ҷинси тифли навзодро мард ва вазнашро 3 килою 350 грамм арзёбӣ мекунанд.
Вазорати умури дохилии Тоҷикистон таъкид мекунад, афроде, ки ҳаёти ин тифлро дар хатар гузоштаанд, мавриди кофткоб қарор дошта, ҳамчунин чорабиниҳои фаврӣ-ҷустуҷӯӣ барои муайян намудани модари кӯдак идома доранд.