баргард чоп кардан

Пӯлодов: Сӯзани фурӯбурдаи Шукрона хориҷ шудааст (ВИДЕО)

Холбозор Пӯлодов, табиби беморхонаи Қаряи болои Душанбе мегӯяд, сӯзани фурӯбурдаи Шукрона Давлатоваи 12-сола хориҷ шудааст.

Пӯлодов дар субҳи 4-уми июн дар суҳбат ба “Озодагон” гуфт, ташхиси ахир нишон дод, ки сӯзани фурӯбурдаи Шукрона аллакай берун шудааст: “Муоинаи охири Шукронаро бо ҳайати ҳамкорон гузаронда, муайян кардем, ки аз сӯзан осоре нест. Агар сӯзан то ин вақт дар меъдааш мебуд ӯро азият медод.” Пӯлодов афзуд, ки феълан вазъи саломатии Шукрона хуб буда, таҳти назорати табибон қарор дорад.

Ин табиб гуфт, дар ташхисҳои қаблӣ сӯзан намоён буд. Ба гуфтаи ӯ хонаводаи Шукрона ба онҳо 29 май муроҷиат кардаанд: “Ҳангоми навбатдории мо омада гуфтанд, ки духтар сӯзан хӯрда, як рӯз ба ҳеч кас нагуфтааст. Ин сӯзани борик буда, халанда нест. Он вақт дар рӯдаи борик буд. Мо назорат кардем, ягон шикояти дард набуд. Гуфтанд, ки шароит нест ва пагоҳ меоем. Вақте пагоҳаш омаданд, сӯзан ба рӯдаи ғафс гузаштааст. Ҳозир ду бор ташхис кардем, ки сузан хориҷ шудааст.”

Шукрона Давлатова, хонандаи синфи панҷуми мактаби №172-и ноҳияи Рӯдакӣ, мегӯяд, аз тарси он ки муаллима озораш надиҳад, пеш аз дохили синфхона шудан рӯсарии худро аз сар гирифта, сӯзани онро дар даҳонаш гузоштааст, ки баъдан ба меъдаш рафтааст:



Чанд сол пеш Вазорати маорифи Тоҷикистон низоми либоси ягона (униформ) ва ё формаи мактабиро ҷорӣ кард, ки бар асоси он бо сатр ё рӯсарӣ ҳозир шудан дар таълимгоҳҳо, яъне мактабҳои миёнаву донишгоҳҳо, мамнуъст. Омӯзгорон аз толибаҳо ва донишҷӯён тақозо мекунанд, ки ҳамеша бо либоси ягона ба дарсҳо оянд.