ВИДЕО: 9 ҳазор “лайк”-и баромади муҳоҷири тоҷик дар Comedy Club
Навори баромади навбатии Иброҳим Бозоров, муҳоҷири тоҷик аз шаҳри Панҷакент, ки азми тасхири саҳнаи Comedy Club дар Маскавро дорад, дар шабакаи иҷтимоии “Одноклассники” қариб 9 ҳазор лайк гирифтааст. Бозоров, ки дар муҳоҷират, ҳамчун устои муҳарриксоз кор мекунад, мунтазам дар сабқатҳо барои роҳ ёфтан ба барномаи Comedy Club баромад мекунад, аммо то ҳол ба давраҳои ниҳоӣ роҳ наёфтааст.
Бисёре аз шарҳнависони тоҷик дар шабакаҳои иҷтимоӣ баромадҳои Бозоровро мавриди интиқод қарор додаанд, ки муҳтавои паст дошта, муъҷиби коҳиши обрӯйи тоҷикон дар Русия мешаванд. Гуруҳи дигар аз азми Бозоров истиқбол намуда, таъкид мекунанд, ки ба ҳар сурат ӯ метавонад, ҳозирини толорро хандонад.
Худи Бозоров мегӯяд, нокомиҳо ӯро намешикананд ва ӯ аз ҳаҷвнигорӣ даст намекашад. Ба гуфтаи ӯ шояд ҳаҷвнигори маъруф нашавад, вале ҳаҷву тахайюлот ба ӯ кӯмак мекунанд, ки бисёри мушкилоти зиндагӣ дар муҳоҷиратро пушти сар созад.