Эмомалӣ Раҳмон: Се барномаи давлатӣ мавриди омӯзиш қарор дода шавад

Баъд аз зӯҳри дирӯз президент Эмомалӣ Раҳмон ба ноҳияи Балҷувони вилояти Хатлон ташриф овард.

---

Бино ба қавли хадамоти матбуотии райисҷумҳур дар ин ноҳияи кӯҳистон Эмомалӣ Раҳмон нахуст дар маросими мавриди истифода қарор додани  бинои нави комиссариати ҳарбии ноҳия, ки бо тамоми шароити зарурӣ бунёд ёфтааст, иштирок кард.  Дар деҳаи Сари Мазори ҷамоати деҳоти Саталмуш бошад, бо иштироки президент як чойхонаи миллӣ мавриди баҳрабардорӣ қарор гирифт.

Манбаъ афзуд, дар саҳни ин чойхонаи тозабунёд райисҷумҳур бо роҳбарият ва  фаъолон инчунин намояндагони сершумори мардуми ноҳияи Балҷувон мулоқоти озоду ошкоро анҷом дод.

Эмомалӣ Раҳмон иброз дошт, ки   рафти татбиқи се барномаи давлатӣ, ки барои рушди ноҳияи Балҷувон, аз ҷумла барои барпо намудани инфрасохтори истироҳату сайёҳӣ аз ҷониби ҳукумати ҷумҳурии Тоҷикистон тайи 10 соли охир қабул шудаанд, мавриди омўзиш қарор гирифта, нисбат ба сохторҳо ва нафароне, ки вазифаҳои худро иҷро накардаанд, хулосаҳои зарурӣ бароварда шаванд.{jathumbnail off}