ВИДЕО: Муъминов дар бораи куҳнавардӣ, ҷавонон ва дастгирии ҳукумат
Нилуфари КАРИМ Фарҳод Муъминов, варзишгари тоҷик, ки дирӯз 14-уми январ нуқтаи баландтарини қитъаи Африқо – қуллаи Килиманҷаро фатҳ намудааст, дар суҳбат бо “Озодагон” аз куҳнавардӣ, имкониятҳои маҳдуди ҷавонони тоҷик ва кӯмакҳои аз Эмомалӣ Раҳмон, раисиҷумҳури Тоҷикистон гирифтааш нақл кард.Озодагон: Айни ҳол дар куҷо қарор доред ва ба чӣ кор машғулед?Муъминов: Ман дар давлати Танзания қарор дорам. Дирӯз мо аз қулла фаромадем. Дар қулла байрақи Тоҷикистонро гузоштам. Озодагон: Ба ғайр аз Тоҷикистон боз намояндаҳои кадом кишварҳо дар экспедитсия ширкат карданд?Озодагон: Куҳнавардӣ, ки як бахши хавфноки варзиш аст, чӣ тавр шуд, ки мақбулатон шуд? Муъминов: Бале, дуруст қайд кардед, куҳнавардӣ як намуди варзиши хатарнок аст ва олимон низ ин соҳаро ба қатори варзишҳои хатарнок ворид кардаанд. Ман аз хурдӣ ин соҳаро дӯст медорам. Дар ҳар як кор хатарҳо вуҷуд доранд ва ба фикри ман соҳаи куҳнавардӣ на он қадар хатарнок аст. Тавасути ин соҳа метавон бо тамоми давлатҳо ва табиати дигар кишварҳо ошно шуда, дустони нав пайдо кард. Озодагон: Ҳангоми фатҳи қуллаҳо Шумо худро чӣ тавр эҳсос мекунед. Оё шуморо тарс фаро мегирад?Муъминов: Дар ҳамин давлате, ки ман қарор дорам, як куҳ аст, ки баландтарин дар Африқо буда, номаш Килиманҷаро ва баландиаш 5 ҳазору 895 метр аст. Мардуми Танзания аз ҳисоби ҳамин куҳ даромади зиёде мебинанд. Агар ҳамин корҳоро дар оянда дар Тоҷикистон низ кунем, бисёр хуб мешуд, зеро мо бисёр куҳҳои зебо ва диданӣ дорем. Аслан сатҳи иқтисодиёти кишварро аз ҳисоби табиат бардоштан мумкин аст. Озодагон: Ба рушди соҳаи куҳнавардӣ дар Тоҷикистон чӣ назар доред? Муъминов: Дар Тоҷикистон соҳаи куҳнавардӣ он қадар рушд накардааст, зеро соҳаи туризми мо заиф аст. Агар ҳамасола ба Тоҷикистон 20-30 ҳазор сайёҳ биёяд ба дигар давлатҳо бошад миллионҳо сайёҳ ворид мешавад.Озодагон: Шавқу ҳаваси ҷавонписарон ва духтарони тоҷикро ба соҳаи куҳнавардӣ чӣ гуна баҳогузорӣ мекунед? Муъминов: Дар Тоҷикистон албатта ҷавонон ба ин соҳа шавқи зиёд доранд, аммо шароити иқтисодии мо имкон намедиҳад, ки ҷавонон дар экспедитсияҳои байналмилалӣ иштирок кунанд. Озодагон: Қаблан гуфта мешуд, ки иштироки Шуморо дар экспедитсияҳои байналмилалӣ шахсан Эмомалӣ Раҳмон, раисиҷумҳури Тоҷикистон сармоягузорӣ мекунад. Ин то куҷо дуруст аст? Муъминов: Ташкилкунандагони экспедитсия қаблан ба номи президенти кишварамон Эмомалӣ Раҳмон муроҷиат карда, хостанд, иштироки маро аз номи Тоҷикистон дар экспедитсия таъмин кунад. Аз дастгоҳи президент нома ба Кумитаи варзиш ва саёҳии кишвар рафта аз онҷо ба ман занг заданд ва ҳадафи дар ин экспедитсия иштирок карданамро пурсиданд. Баъд аз ин тамоми хароҷот аз ҳисоби ҳукумати кишвар пардохт шуд. Маликшо Неъматов, раҳбари Кумитаи варзиш ба ман занг зада аҳволпурсӣ мекунанд, маблағ даркор шавад мефиристонанд. Озодагон: Ин чандум мусобиқаи байналмилалие аст, ки Шумо иштирок мекунед?Муъминов: Ба ғайр аз мусобиқаҳое, ки дар Русия мегузарад ва ман иштирок кардаам, ин 9-умин экпедитсияи байналмилалиест, ки иштирок дорам ва байрақи Тоҷикистонро дар қуллаҳои баландтарини дунё гузоштаам. Ман ду қуллаи ҳафтҳазорметра - Корженевская (7105 м), Абӯалӣ ибни Сино (7134 м) ва инчунин қуллаи Элбрус (5642 м)-ро фатҳ кардаам. Озодагон: Дар ҳамин мусобиқаҳои, ки Шумо иштирок мекунед ягон ҷоиза доранд ва дар ин экспедитсия ба Шумо чӣ ҷоиза пешбинӣ шудааст? Муъминов: Ба ҳар иштирокчие, ки қулларо фатҳ намуд шаҳодатнома дода мешавад. Аммо ба хотири оне, ки ман аз миёни иштирокдорон аввалин шуда, ба ин қулла баромадам, мегӯянд, ки ба ман унвони устоди байналмилалии куҳнавардиро медиҳанд. Ин ҳоло дақиқ нест танҳо аз дӯстон шунидам. Мусоҳиба бо Фарҳод Муъминов тариқи Скайп: VIDEO