"Тӯби тилоӣ"-ро Роналду гирифт (ВИДЕО)
Криштиан Роналду ҷоизаи “Тӯби тилоӣ”-ро ба худ ихтисос дода, беҳтарин футболбози соли 2013 эътироф гардид.
Маросими эълони исми баррандаи “Тӯби тилоӣ” шаби гузашта дар шаҳри Сюрихи Швейсария сурат пазируфт.
Дар баробари Роналду футболбозони маъруф Лионел Мессӣ ва Фрэнк Риберӣ ҳам аз муддаиёни “Тӯби тилоӣ” буданд.
Криштиан Роналду соли 2008 низ соҳиби “Тӯби тилоӣ” шуда буд.
Криштиану Роналду душ Сантуш Авейру 5 феврали соли 1985 дар шаҳри Фуншали Португалия ба дунё омадааст. Гаронтарин бозигар дар таърихи футболи ҷаҳон аст. Барои аз “Манчестер Юнайтед”-и Англия ба “Реал”-и Мадрид гузаштани ӯ беш аз 83 миллион фунт стерлинг пардохт шудааст.
Беҳтарин нишонзан дар таърихи мунтахаби Португалия мебошад. Яке аз беҳтаринҳои футболи муосир дониста мешавад. Ӯ беҳтарин бозигари ҷавони чемпионати Аврупо дар соли 2004 эътироф гаридааст. Қаҳрамони премер-лигаи Англия дар мавсимҳои 2006/07 (беҳтарин бозигар ва беҳтарин бозигари ҷавон), 2007/08 (беҳтарин бозигари мавсим) ва 2008/09. Ҷоизадори “Бутси тилоӣ” дар солҳои 2008 ва 2011.