ВКД: Шавҳар дар Ваҳдат занашро бо болға куштааст
Як сокини 31-солаи Ваҳдат дар куштори ҳамсари 25-солааш муттаҳам мешавад.
Вазорати умури дохилии Тоҷикистон мегӯяд, аз ҷониби кормандони пулиси шаҳри Ваҳдат, Нафасов Ҷамолиддин Зоирович, соли таваллудаш 1982, зодаи ноҳияи Ёвон, муваққатан истиқоматкунандаи шаҳри Ваҳдат бо гумони даст доштан ба куштори ҳамсараш дастгир карда шуд.
Ба иттилои манбаъ дастгиршуда рўзи 12-уми ноябр, тахминан соати 19.00 дақиқа аз сабаби муноқишаи ба миён омада, бо болғаи дар дасташ буда, якчанд маротиба ба узвҳои бадани ҳамсараш Раҳмонова Зарина Тағоевна, соли таваллудаш 1987 задааст, ки дар натиҷа охирон ҷароҳатҳои вазнини ҷисмонӣ бардошта, ҳангоми ба беморхона бурдан, дар роҳ ба ҳалокат расидааст.
ВКД мегӯяд, далели шайъӣ гирифта шуда, нисбати ҳодисаи мазкур парвандаи ҷиноӣ оғоз гардида, тафтишот идома дорад.