баргард чоп кардан

ВИДЕО: “Мурам Шумоба...", "ваҚилони халқ", "давай дасвидания"

Навиштаҷоти аҷибу ғариб як ҷузъи зиндагии мо шудааст. Сари ҳар қадам ба навиштаҳое рӯбарӯ мешавем, ки ҳеч набошад ба лабон табассум медамад. Ба лаб табассум, ба бадан мурғак. Баъзан ин табассум аз гиря талхтар аст.


Барои мисол:

"Мағозаи варзишӣ. Бо сифати калон"
Сифати аълояшро медонем. Калонаш чӣ аст? Шояд дар ин мағоза танҳо либосҳо барои варзишгарони бузургҷусса фурӯхта мешавад?

"Илтимос аз тиреза нос туф накунед"
Аз дар туф кунед, майлаш. Фақат аз тиреза туф накунед, Кали Ҳалим дар поён семичка мефурӯшад. Мабодо дар сараш расад, дунё ба сарамон қиёмат мешавад.



"Гиречка"
Гиречкада, биё, бача, пиЮзда биё, нУхУд арзон шид, ктшкаи беҳтарин...

"Балони фуруши. БЕУ"
Шумо ҳайрон нашавед. БЕУ тамғаи мошин нест, номи балон ҳам. Маънӣ ин аст, балонҳоро бе ӯ, яъне бе духтари назди чархҳо истода мехаред.

"Мурам Шумоба, Закрывайте за собой дверь!!"
Дар мо мегӯянд, ё ба зорӣ ё ба зурӣ ё ба зар. Инҳо аз варианти аввал кор гирифтаанд. Фикр мекунам, нишонрас ҳам ҳаст. Зимнан, мо ҳам чанд пешниҳод дорем, умедворам мақбул бошад: “Хоки пот шавум, дара оҳиста пуш”, Холат мура, ҳаму дарака маҳкам кун”. “Ҷияни тағо, пӯшидани дар фаромуш нашава”...

"Маҷлиси ваҚилони халқ"
Мардум ҳамеша шикоят мекунанд, ки вакилони интихобкардаашон ваъдаҳои пешазинтихобот додаи худро иҷро намекунанд, дуруст ҳам мекунанд. Охир шумо ба вакил овоз додед, онҳо бошанд, ваҚиланд.

"Молҳо аз Аврупо Ксерокопия"
Боз мегӯянд, дар мо тоҷирони боинсоф намондаанд. Анна, мардак иқрор кардааст-ку. Молҳо нусхабардоришудаи Аврупо...

"Ламинация мобильных телефонов Саволхои бекора надихед"
Ба фикрам, кормандони ин нуқтаи хизматрасонӣ аз саволҳои беҷои мизоҷон ба дод омадаанд. Шояд аз онҳо мепурсанд, ки чаро Ойниҳол Бобоназарова имзои зарурӣ ҷамъ накард? Ё чаро номзади мақоми президентӣ мегӯяд, мақсади ман президент шудан нест? Ё шояд аз ӯ зиёд мепурсанд, ки як халта орд чанд сомонӣ аст? Ё президенти Уругвай чӣ ном дорад...

Ба мавзӯи навиштаҷот ҳатман бармегардем. Аммо ҳоло: "Давай дасвидания!"