Красноярск муддаии ягона барои мизбонии Универсиада-2019
Красноярск ягона муддаӣ барои баргузории Универсиадаи зимистона дар соли 2019 аст.
Шаҳри Валеи Швейтсария номзадияшро паст гирифтааст. Мақомоти Швейтсария гуфтаанд, шонси баранда шудани шаҳрашон чандон бузург нест ва аз ин рӯ тасмим гирифтаанд, муддаӣ набошанд. Онҳо қасд доранд барои мизбонии Универсиадаи соли 2021 талош варзанд.
Пас гирифтани номзадии Вале ба маънии ба таври автоматӣ пирӯз шудани Красноярск нест. Агар Федератсияи байналмилалии варзиши донишҷӯён бигӯяд, ки ин шаҳри Русия барои гузарондани мусобиқа омода нест, имкони аз сар гирифтани маъракаи қабули дархостҳои нав ба миён меояд. Хулосаи ниҳоӣ дар мавриди дархости Красноярск 9-уми ноябри соли 2013 гирифта мешавад.
Универсиада, мусобиқаи байналмилалии варзишӣ, ки дар он донишҷӯён иштирок мекунанд, дар ду сол як маротиба- тобистон ва зимистон гузаронда мешавад. Универсиадаи тобистонаи соли 2013 дар Қазон гузашта, мизбони зимистонааш шаҳри Трентинои Италия аст. Соли 2015 Универсиадаи тобистона дар Кванҷуи Корея ва зимистона дар Гранадаи Испания мегузарад.