“Барселона” як бозигари «Манчестер Сити»-ро гирифт
Клуби футболи “Барселона”-и Испания Денис Суарес, нимҳимоятгари бошгоҳи «Манчестер Сити»-и Англияро харид. Дар ин бора торнамои расмии «Барселона» хабар додааст.
Аммо манбаъ, маблағи трансферро эълон накардааст. Муҳлати қарордоди Суарес ва клуби Испания чор сол буда, нимҳимоятгари 19-сола дар ҳайати тими дуюми «Барселона» дар Лигаи дуюми чемпионати Испания ширкат мекунад.
Суарес тарбиятгирифтаи клуби «Селта» буда, соли 2011 ба «Манчестер Сити» пайваст. Ӯ ҳамчунин бозигари тими миллии то 19-солаҳои Испания мебошад.