Клипи таронаи «Светлые дни»-и Парвиз Назаров дар садри хит-паради беҳтарин клипҳои Қазоқистон- Команда KZ қарор дорад.
Ин хит-парад аз сӯйи шабакаи телевизионии мусиқии Muzzone ва торнамои Headline.kz пешниҳод шуда аст. Хит-паради мазкур аз 30 клип иборат буда, ҳар ҳафта натиҷагирӣ мешавад. Клипе, ки мақоми охирро касб мекунад, аз феҳраст берун ва ҷои онро клипи нав мегирад.
Овоздиҳӣ дар сомонаи https://muzone.headline.kz сурат гирифта, натиҷаи он ҳар рӯзи ҷумъа тариқи шабакаи Muzzone намоиш дода мешавад.
То замони навишта шудани ин хабар клипи «Светлые дни»-и Парвиз Назаров бо 1175 райъ дар мақоми аввал қарор дошт. Клипи «Алдандым»-и AYSA 1160 овоз дорад.
Парвиз Назаров, яке аз пайвандони Далер Назаров, аз маъруфтарин сарояндаҳои тоҷик аст. Ӯ соли 1971 дар шаҳри Маскав таваллуд шуда, дар Душанбе ба воя расидааст. Соли 1987 гуруҳи «Адвокат» ва соли 1989 гуруҳи «Парвин»-ро таъсис дод. Аз соли 1993 то имрӯз дар Қазоқистон кору зиндагӣ мекунад.