Главная > Тоҷикистон, Сиёсат, Тема дня > “Ақибнишинӣ”-и се рақиби Исмонов: Шонсам хеле ва хеле зиёд шуд!

“Ақибнишинӣ”-и се рақиби Исмонов: Шонсам хеле ва хеле зиёд шуд!


23 феврал 2015, 17:13. Разместил: hd
Се рақиби Саидҷаъфар Исмонов, раиси Ҳизби демократи Тоҷикистон аз идомаи рақобат дар интихоботи парлумонӣ даст кашида, номзадияшонро ба парлумон аз ҳавзаи якмандатии рақами 34-и ноҳияи Фархор бозпас гирифтаанд.

Масъулини ин ҳавза мегӯянд, аз ҷумла Нуриддин Азаматов – номзад аз Ҳизби аграрии Тоҷикистон, Сафаралӣ Шарифов – номзад аз Ҳизби халқӣ- демократии Тоҷикистон ва Мавлонбӣ Тӯраева – номзади худпешбар ба вакилии Маҷлиси намояндагони Тоҷикистон аз ҳавзаи рақами 34-и Фархор номзадии худро бозпас гирифтаанд.

Феълан дар ин ҳавза барои дарёфти курсӣ дар палатаи поёнии парлумони Тоҷикистон се номзади дигар, Саидҷаъфар Исмонов – раиси Ҳизби демократӣ (ҲДТ), Зайниддин Юсуфов, узви Ҳизби наҳзати исломии Тоҷикистон (ҲНИТ) ва Юсуфхон Сайфиддинов, ки худпешбар аст, рақобат хоҳанд кард.
Дар шарҳи “ақибнишинӣ”-и рақибонаш Сайидҷаъфар Исмонов, раиси ҲДТ рӯзи 23 феврал ба “Озодагон” гуфт, бо даст кашидани намояндаи ҲХДТ ва ҲАТ имконияти ӯ барои дарёфти курсӣ дар парлумон бештар хоҳад шуд: “Мо бо Сафаралӣ Шарифов дар як мактаб хонда дар як ҷамоат ба воя расидаем ва агар ин нафар ва намояндаи ҲАТ номзадиашонро гирифта бошанд, шонси ман хеле ва хеле бештар мешавад”.

Дар ҳавзаи якмандатаи рақами 34-и Фархор 11 ҳазору 732 нафар интихобкунанда ба қайд гирифта шудааст, ки аз ин нишондод танҳо 1 ҳазору 908 нафар нахустин бор пой ба назди сандуқҳои раъйдиҳӣ мегузоранд ва 9 ҳазору 590 нафари дигари интихобкунандагон дар муҳоҷирати меҳнатӣ қарор доранд.

Вернуться назад